TIRANË, 16 prill/ATSH/ Kryetarja e Kuvendit, Lindita Nikolla, uroi sot besimtarët ortodoksë për Festën e Pashkëve.
Në mesazhin e saj për besimtarët ortodoksë Nikolla thekson se ringjallja e Krishtit, ishte një dritë e hareshme që treti errësirën, largoi pikëllimin dhe lajmëroi një fillim të ri
“Ringjallja e Krishtit, një dritë e hareshme që treti errësirën, largoi pikëllimin dhe lajmëroi një fillim të ri. Festa e Pashkëve zgjon ëndrrat, ndihmon besimtarët, na ndihmon të gjithëve, për të kapërcyer vështirësitë, mundur lodhjen, korrigjuar dobësitë njerëzore, larguar pesimizmin, frikën, urrejtjen dhe përqafuar besimin, kurajon, ëmbëlsinë njerëzore. Festa e Pashkëve na ngjit në malin e lartë të humanizmit, përkushtimit, dashurisë. Gëzuar Pashkët, shëndet e mbarësi për të gjithë besimtarët ortodoksë!”, thuhet në mesazhin e kryeparlamentares Nikolla.
