TIRANË, 30 dhjetor/ATSH/ Pjesë e paketës mbështetëse për të përballuar pasojat e luftës së Rusisë në Ukrainë, reflektuar me rritje çmimesh, do të jenë edhe punonjësit e terrenit të sektorit energjetik, OSHEE, OST dhe KESH.
Lajmi u bë i ditur nga zëvendëskryeministrja Belinda Balluku, njëherësh ministre e Infrastrukturës dhe Energjisë.
Qeveria pritet të prezantojë sot një paketë mbështetëse për 1 milion individë, për të lehtësuar barrën e inflacionit të lartë të shkaktuar nga Lufta e Rusisë në Ukrainë.
Nga kjo paketë 695 mijë pensionistë do të përfitojnë 8 mijë lekë. Do të kenë pjesën e tyre 1 milion shqiptarë, që do të përfitojnë sipas kategorive deri në 20 000 lekë, për të zbutur impaktin e inflacionit të luftës.
Mbështetje do të marrin familjet në ndihmë ekonomike, posaçërisht nënat kryefamiljare në skemën e ndihmës ekonomike, paraplegjikët, tetraplegjikët, personat me aftësi të kufizuara, invalidët e punës, po edhe për punonjësit e shtetit.
Paketa mbështetëse e qeverisë prej 8 miliardë lekë do të shpërndahet e gjitha në ditët e para të janarit.
