TIRANË, 2 gusht /ATSH-I.Vata/ Ministria e Mbrojtjes deklaroi sot se gjatë muajit korrik, janë shuar në të gjithë territorin e vendit 361 vatra zjarri.
Ministria e Mbrojtjes njofton se, “Forcat Operacionale, nën koordinimin e Agjencisë së Mbrojtjes Civile u janë përgjigjur në kohë të shpejtë të gjitha thirrjeve për ndërhyrje, duke shmangur pasoja më të rënda në mjaft prej këtyre zjarreve të ndezura”.
“Në një pjesë të operacioneve është dashur edhe ndërhyrja nga ajri, e cila ka qenë e menjëhershme. Shqipëria i është drejtuar Mekanizmit të Mbrojtjes Civile Evropiane, në kuadër të të cilit pala greke i është përgjigjur në kohë rekord, me avionë për shuarjen e zjarreve në ishullin e Sazanit, bashkinë e Dropullit apo edhe në Finiq”, thuhet në njoftimin e për shtyp të Ministrisë.
/r.e/
