PARIS, 4 korrik /ATSH-ANSA/- Zyra e presidentit francez njoftoi sot një riorganizim të qeverisë që ishte raportuar paraprakisht prej muajsh nga media franceze.
Olivier Véran, ish-ministri i Shëndetësisë që fitoi popullaritet gjatë pandemisë së COVID-19, u emërua zëdhënës i qeverisë. Damien Abad, ministri i Solidaritetit, i cili është vënë nën hetim i dyshuar për përdhunim, është shkarkuar nga detyra.
Ministrja e Shëndetësisë, Brigitte Bourguignon, e cila nuk mori mbështetje të mjaftueshme gjatë zgjedhjeve parlamentare të qershorit, është zëvendësuar nga François Braun, një mjek i urgjencës.
Kjo zgjedhje duket se ka ardhur si përgjigje ndaj protestave brenda sektorit spitalor për mungesën e personelit. Emërimi i drejtorit të Kryqit të Kuq francez, Jean-Christophe Combe si ministër i Solidaritetit në vend të Damien Abad duket se është për arsye të ngjashme.
Ekonomisti i lartë i Organizatës për Bashkëpunim dhe Zhvillim Ekonomik (OECD), Laurence Boone është emëruar nënsekretar për Evropën në vend të Clément Beaune, një mbështetës i ngushtë i presidentit Emmanuel Macron.
Beaune ka marrë rolin e ministrit të Transportit. Në bazë të një rregulli të mbështetur nga Macron, ministrat që humbën në zgjedhje duhet të largohen nga postet e tyre qeveritare, ministrja për Tranzicionin Ekologjik, Amélie de Montchalin është larguar nga posti i saj dhe do të zëvendësohet nga kryebashkiaku i Angers, Christophe Beçu.
Ministri i Brendshëm, Gérald Darmanin do të ketë një angazhim më të gjerë dhe tani e tutje do të ngarkohet edhe me territoret jashtë shtetit.
Ish-anëtari i partive komuniste dhe socialiste të Francës, Olivier Klein do të hyjë gjithashtu në qeveri si ministër i ngarkuar për Çështjet e Strehimit dhe Qytetit.//a.i/
