TIRANË, 27 qershor/ATSH/ Presidenti Ilir Meta deklaroi sot se “po dëshmohet qartësisht dhënia e koncesioneve dhe PPP-ve në mënyrë korruptive dhe klienteliste”.
Meta tha se “këtë e tregon rritja e pandalshme e kostos së ndërtimit, kryesisht të rrugëve”.
“Fakti që ndërtimi i rrugëve në Shqipëri ka koston më shtrenjtë se në vendet e Bashkimit Europian dhe të rajonit, është një tregues shumë domethënës i abuzimit me fondet publike”, tha ai.
Sipas Presidentit, “këto praktika janë shumë të dëmshme për ekonominë e vendit, veçanërisht për rëndimin e buxhetit të shtetit dhe rritjen e pandalshme të borxhit publik”.
“Është jetike të shtohen përpjekjet për të minimizuar dhënien e koncesioneve, forcimin e sundimit të ligjit dhe ndëshkimin e përgjegjësve në nivelet më të larta shtetërore të përfshirë në këto afera”, tha ai.
/m.m/r.e/
