TIRANË, 22 qershor/ATSH/ Këshilli i Ministrave miratoi sot një shtesë në vendimin “Për përdorimin e fondit të rindërtimit për financimin e ndërtimit të objektit ‘Poli i ri administrativ, njësia administrative Bubq, bashkia Krujë dhe caktimin e Bashkisë Krujë si njësi zbatuese”.
Vendimi parashikon përdorimin e fondit të rindërtimit për vitin 2022, nga Bashkia Krujë për ndërtimin e objektit “Poli i ri administrativ”, njësia administrative Bubq, Bashkia Krujë, në masën 190 503 875 lekë pa TVSH, i cili do të përballohet nga hapësira buxhetore e siguruar pas ngurtësimit në të njëjtën masë të fondeve të projekteve të rindërtimit me ecuri të ngadaltë, dhe i transferohet Bashkisë Krujë, në formën e transfertës së pakushtëzuar.
Për zbatimin e këtij vendimi ngarkohen Zëvendëskryeministri dhe ministër i Shtetit për Rindërtimin dhe Programin e Reformave, Ministria e Financave dhe Ekonomisë dhe bashkia Krujë. /m.m/
