KIEV, 13 qershor /ATSH-DPA/ – Ushtria ukrainase deklaroi se trupat e saj ishin dëbuar nga qendra e Severodonetsk, pika qendrore e përpjekjeve ruse në rajonin lindor të Donbasit për javë të tëra.
”Forcat ruse bombarduan qendrën e qytetit me artileri dhe dëbuan ushtarët ukrainas të mbetur atje”, theksoi shefi i Shtabit të Përgjithshëm në Kiev.
Raporti i situatës thoshte se pavarësisht pengesave të rënda rreth Severodonetskut, luftimet vazhduan dhe se Ukraina po ruan kontrollin e rreth një të tretës së qytetit në përgjithësi.
Disa orë më parë, presidenti Volodymyr Zelensky kishte thënë se “luftohet për çdo metër katror” në qytetin industrial me rëndësi strategjike.
Rusia pushtoi qytetin port të Mariupolit në maj pas një rrethimi prej muajsh dhe më pas ktheu më shumë vëmendje në marrjen e kontrollit të provincës Luhansk, ku ndodhet Severodonetsku.
Rusia tani kontrollon 90% të Luhanskut dhe ka bërë përparime në rritje për të rrethuar plotësisht Severodonetsk.
Luhansk dhe provinca fqinje Donetsk përbëjnë rajonin e njohur si Donbas, i cili kufizohet me Rusinë./ /os/
