PRISHTINË, 4 qershor /ATSH/ Pasditen e djeshme një 69-vjeçar nga komuna e Dragashit ka kërkuar ndihmë në Klinikën Infektive të QKUK me simptoma të lisë së majmunit. I njëjti është hospitalizuar në Infektivë dhe i është marrë mostër nga ndryshimi lëkuror dhe do të dërgohet për analiza laboratorike.
Sipas Ministrisë së Shëndetësisë, gjendja e pacientit është stabël ndërsa po vazhdon mbikëqyrja epidemiologjike e pacientit dhe gjurmimi i kontakteve.
“Mostra do të dërgohet në laboratorin referent të OBSH në Holandë, presim edhe rezultatet laboratorike deri në diagnozën përfundimtare sipas kritereve të parapara. Pacienti është në izolim, i hospitalizuar në Klinikën Infektive, QKUK”, njoftoi Ministria e Shëndetësisë.
Ministria e Shëndetësisë dhe IKSHPK, njoftojnë qytetarët, se për çdo informatë të re, opinioni publik do të informohet në kohë reale, dhe se situata është e qetë dhe stabël.
