TIRANË, 24 maj/ATSH-Maela Marini/ Nënkryetari i Këshillit Kombëtar të Integrimit Europian, Taulant Balla kërkoi sot që dosje si ajo e “21 janarit” të hetohen nga Prokuroria e Posaçme kundër Krimit të Organizuar dhe Korrupsionit.
Në mbledhjen e sotme të Këshillit, Balla tha se ky është vlerësim për SPAK.
“Askush nuk duhet të ketë dyshime që Kuvendi apo mazhoranca aktuale ka dyshime në besimin e investuar në këto institucione”, tha Balla.
Po ashtu, ai kërkoi që të jetë në strukturën e punës së SPAK, që kur bëhet një kallëzim penal të informohemi.
“Kemi pasur rastin e komisionit hetimor që kemi mbledhur gjetje, kemi ngritur akuza dhe nuk dimë çfarë është bërë. Nuk kemi marrë asnjë përgjigje. Unë kam bërë vetë kallëzim penal 2 vite më parë, por nuk më ka thërritur njeri si qytetar. Le t’i marrim këto si rekomandime pozitive”, tha Balla. /m.m/j.p/
