TIRANË, 17 mars /ATSH/ Presidenti i Republikës, Ilir Meta priti sot ambasadorin e Republikës Socialiste të Vietnamit në Shqipëri (rezident në Athinë), Le Hong Troung, me rastin e paraqitjes së Letrave Kredenciale.
Presidenti Meta i uroi ambasadorit Le Hong Troung suksese në misionin e tij diplomatik në Shqipëri duke nënvizuar rëndësinë e forcimit të marrëdhënieve tradicionale miqësore mes dy vendeve në fushat me interes reciprok, në kontekstin e ri të zhvillimeve në të dy vendet dhe objektivave për zhvillim të qëndrueshëm në botë.
Kreu i Shtetit vendosi theksin në më shumë përpjekje, në të ardhmen, për përmirësimin e kuadrit ligjor reciprok në dobi të forcimit të bashkëpunimit ekonomik, tregtar dhe nxitjes e shkëmbimeve në fushën e turizmit.
“Bashkëpunimi dhe bashkëveprimi në kuadër të organizatave ndërkombëtare, veçanërisht në atë të OKB-së, për paqen, sigurinë dhe stabilitetin në botë, mbetet një fushë e rëndësishme me dobi për të dy vendet tona”, nënvizoi Presidenti Meta.
/r.e/
