TIRANË, 25 janar /ATSH/ Ministrja e Financave dhe Ekonomisë, Delina Ibrahimaj, mori pjesë sot në Konferencën Kombëtare “Sistemi i kontrollit të brendshëm, si një nga shtyllat kryesore në mirë menaxhimin e financave publike”.
Kjo konferencë u organizua nga MFE, në bashkëpunim me Projektin e Financave Lokale dhe mbështetjen e qeverisë zvicerane.
Në fjalën e saj Ibrahimaj tha se, Ministria e Financave dhe Ekonomisë ka si qëllim mbështetjen e vazhdueshme për njësitë publike në forcimin e sistemit të kontrollit të brendshëm dhe përmirësimin e raportimit financiar të sektorit publik, si pjesë e reformave për mirëmenaxhimin e financave publike.
MFE harton çdo vit Raportin Vjetor mbi funksionimin e sistemit të kontrollit të brendshëm financiar publik në njësitë e qeverisjes së përgjithshme, i cili përveç analizave del me rekomandime për arritjen e objektivave në këtë fushë.
Ndërsa vlerësoi punën e bërë deri më tani, Ibrahimaj theksoi se situata aktuale parashtron një axhendë mjaft ambicioze të reformave për të gjitha institucionet në nivel qendror, ndërkohë që gjatë vitit 2022 do të ketë një fokus të shtuar në institucionet e nivelit lokal.
“Për të arritur progres, duhet që vullneti dhe angazhimi i qëndrueshëm për reformat të jetë maksimal, me qëllim që kontrolli i brendshëm të jetë sa më efikas dhe sa më efektiv. Është me rëndësi kapaciteti i duhur i burimeve njerëzore dhe financiare, ku ne do të vazhdojmë të kryejmë trajnime në të gjitha nivelet e institucioneve, si dhe bashkëpunimi dhe koordinimi mes organizatave dhe institucioneve publike”, u shpreh Ibrahimaj.
Ministrja vuri në dukje faktin se zbatimi me rigorozitet i reformës në menaxhimin e financave publike dhe konkretisht prioritizimi i masave në fushën e kontrollit të brendshëm, pjesë e një prej kapitujve themelorë të Acquis (Kapitulli 32 “Kontrolli Financiar”), do të shërbejë si një instrument për përshpejtimin e negociatave të pranimit në Bashkimin Evropian, si një proces thelbësor për zhvillimin e mëtejshëm të vendit tonë.
/a.a/r.e/
