ROMË, 28 dhjetor /ATSH/ – Shumë shpesh ka konfuzion midis alergjive ushqimore dhe intolerancave.
Konceptet janë shumë të ndryshme, megjithëse simptomat janë kryesisht të lidhura me njëra-tjetrën, shkruan pazienti.it.
Alergjia e vërtetë ushqimore është shumë e vështirë të shfaqet.
Në fakt, vetëm 2% e popullsisë dhe 8% e fëmijëve nën tre vjeç vuajnë nga kjo, ndërsa intoleranca shfaqet më shpesh.
Si të dalloni një alergji të vërtetë ushqimore?
Alergjia është një reagim i fortë i sistemit imunitar, i cili shkaktohet si përgjigje ndaj një antigjeni. Në fakt, në vend të “antigjenit”, kur merret parasysh një alergji ushqimore, do të ishte më e drejtë të flitej për “alergjen”.
Alergjeni, në shumë raste, priret të njohë lëndët ushqyese dhe proteinat e shëndetshme si substanca të dëmshme për të gjithë trupin.
Prandaj sistemi i antitrupave shkakton një përgjigje imune: është vetë ushqimi me alergjenët e tij (më saktë proteinat që përmban) që shkaktojnë këtë përgjigje disproporcionale, e cila mund të sjellë edhe pasoja shumë të dëmshme për të gjithë organizmin.
Fëmijët shpesh kanë alergji edhe ndaj qumështit dhe vezëve.
Intolerancat ushqimore, çfarë janë dhe si t’i njohim?
Intolerancat ushqimore janë shumë më të zakonshme sesa alergjitë ushqimore. Simptomat e intolerancës ushqimore priren të vijnë shumë më ngadalë sesa alergjitë: në fakt, simptomat shpesh vijnë shumë orë pas ngrënies së ushqimit.
Simptomat tipike të intolerancës ushqimore janë fryrja dhe ngërçet në stomak. Është gjithashtu e mundur që intoleranca të shfaqet për shumë ushqime të ndryshme.
Kjo mund ta bëjë të vështirë identifikimin se cilat ushqime po shkaktojnë problemin. Intolerancat ushqimore mund të jenë gjithashtu të vështira për t’u dalluar nga çrregullimet e tjera të tretjes që prodhojnë simptoma të ngjashme, të tilla si sëmundja inflamatore e zorrëve, pengesat e traktit gastrointestinal ose sindroma e zorrës së irrituar (IBS).
Një nga intolerancat ushqimore më të zakonshme dhe më të përhapura në botë është intoleranca ndaj laktozës, e njohur edhe si intoleranca ndaj produkteve të qumështit, që ndodh kur trupi nuk është në gjendje të tresë ushqimet që përmbajnë laktozë.
Laktoza është lehtësisht e disponueshme në qumësht dhe produkte qumështi si kosi dhe djathi. Simptomat kryesore të intolerancës ndaj laktozës janë diarreja dhe dhimbja e stomakut./ /os/
