NJU JORK, 17 dhjetor /ATSH-DPA/ – Kompania amerikane farmaceutike ‘Pfizer’ dhe partneri i saj gjerman ‘BioNTech’ po planifikojnë të shtojnë një dozë të tretë në provat klinike të vazhdueshme të vaksinës së koronavirusit për fëmijët e vegjël nga 6 muaj deri në 4 vjeç.
Kompanitë njoftuan të premten se një dozë e tretë e vaksinës do të testohet dhe do të administrohet 2 muaj pas dozës së dytë.
Kjo do të thotë se rezultatet e pritura më parë për këtë vit ose në fillim të vitit të ardhshëm ka të ngjarë të vonohen, ndërsa kompanitë i presin ato në gjysmën e parë të 2022.
Vendimi u mor pasi të dhënat fillestare treguan se fëmijët e moshës 2 deri në 5 vjeç nuk iu përgjigjën aq mirë vaksinës sa iu përgjigjën adoleshentët dhe të rriturit 16 vjeç e lart dhe fëmijët midis 6 dhe 24 muajsh.
“Asnjë shqetësim nuk është identifikuar deri më tani”, raportuan kompanitë.
Sipas kompanive, në studim marrin pjesë rreth 4500 fëmijë nga 6 muajsh deri në 11 vjeç nga disa vende.
Vaksina është miratuar për fëmijët e moshës 5 vjeç e lart në SHBA dhe vendet e BE-së.
BioNTech dhe Pfizer do të kryejnë studime për një dozë të tretë vaksine për fëmijët midis moshës 5 dhe 12 vjeç. //a.i/
