TIRANË, 24 nëntor/ATSH/ Kryetarja e komisionit të Integrimit Evropian, Jorida Tabaku u shpreh sot se ligji për pastrimin e parave nuk godet thelbin e problemit, por ndryshimet e kërkuara janë estetike.
Gjatë mbledhjes së komisionit të Integrimit Evropian ku u shqyrtua projektligji “Për disa ndryshime dhe shtesa në ligjin nr. 9917, datë 19.05.2008 “Për parandalimin e pastrimit të parave dhe financimit të terrorizmit” të ndryshuar, Tabaku u shpreh se ndryshimet në fjalë nuk prekin thelbin e problemit.
“Lufta kundër Pastrimit të Parave është një nga pikat që Shqipëria duhet të përmbushë për konferencën e parë ndërqeveritare. Mirëpo unë kam parë me kohë që një luftë e tillë është fiktive”, tha Tabaku.
Ajo u shpreh se, në kohën kur ishte nënkryetare e komisionit të ekonomisë dhe financave ka kërkuar informacion për pastrimin e parave.
Tabaku tha se, qeveria nuk ka pasur si qëllim luftën reale dhe se fatkeqësisht disa nga pikat e këtij ligji nuk janë konform dhe standard Acquis.
Ne jemi opozitë, u shpreh Tabaku, nuk jemi qeveri dhe vullnetin tonë nuk mund t’ia kalojmë qeverisë. I takon asaj të ketë vullnet për të luftuar pastrimin e parave.
/r.e/
