Çmimet e Sfidës së Kodimit, fituese shkolla 9-vjeçare e Përrenjasit

TIRANË, 24 nëntor/ATSH/ Shkolla 9-vjeçare “Rrajcë-Fushë” në bashkinë e Përrenjasit është fituesja e çmimit të parë të Sfidës së Kodimit për projektin “Smart Park”, një park i veçantë që ndërthur teknologjinë me natyrën dhe botën njerëzore.

Lajmin e bëri të ditur sot kryetari i grupit parlamentar të Partisë Socialiste, Taulant Balla, njëkohësisht deputet i qarkut Elbasan, duke folur për çmimet e ndara nga British Council Albania.

Sipas tij, “sfida e pestë e Kodimit ka si qëllim nxitjen e nxënësve për të përdorur kodimin në trajtimin e problemeve në komunitetet dhe shkollat e tyre, si pjesë e programit ‘Shkollat e Shekullit 21’“.

Juria e përbërë nga tre anëtarë përzgjodhi tre projektet më të mira nga dhjetë ekipet, të cilat prezantuan projektet e tyre gjatë kësaj sfide.

Dy çmimet e tjera u fituan nga shkolla 9-vjeçare “7 Marsi” nga Tirana, e cila u rendit e dyta me projektin “Shkop i sigurt për të verbërit”, si dhe shkolla “Shyqyri Peza” nga Tirana, e cila u rendit e treta me projektin “Zilja automatike”.

/m.m/a.a/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.