TIRANË, 5 nëntor /ATSH/ Kreditë me probleme vijuan rënien edhe në muajin shtator.
Banka e Shqipërisë, bën të ditur se, raporti i kredive me proobleme u ul në nivelin 6.5 %, nga 6.9 % që ishte një muaj më parë.
Sipas BSH-së, treguesi 6.5 % është niveli më i ulët i kredive me probleme i regjistruar që prej nëntorit të vitit 2008.
Përmirësimi i ekonomisë ka ndikuar pozitivisht në aftësinë paguese të subjekteve huamarrëse. Për tremujorin e dytë të këtij viti, Prodhimi i Brendshëm Bruto u rrit me 17.9 % dhe tejkaloi nivelet e vitit 2019, para pandemisë.
Ndërsa rol po aq të rëndësishëm në rënien e raportit të kredive me probleme ka pasur rritja e kreditimit. Guvernatori i Bankës së Shqipërisë, Gent Sejko, tha këtë javë se portofoli i kredisë bankare u rrit me 8.9 % në fund të tremujorit të tretë të këtij viti, i diktuar nga zgjerimi i kredisë në lekë, i kredisë për qëllime investimi dhe i asaj për blerje banese.
/r.e/
