EMA nis rishikimin e trajtimit të ri antiCOVID-19

AMSTERDAM, 25 tetor /ATSH-DPA/ – Agjencia Evropiane e Barnave (EMA) ka filluar procedurën e rishikimit për një trajtim të ri antiCOVID-19.

“Ekspertët do të vlerësojnë të dhënat nga studimet mbi efektin e agjentit antiviral Molnupiravir”, njoftoi EMA.

Ilaçi, në formë pilule, prodhohet bashkërisht nga kompanitë farmaceutike Merck Sharp & Dohme dhe Ridgeback Biotherapeutics.

Sipas rezultateve fillestare të testit, ilaçi dobëson efektin e COVID-19 në trup, gjë që teorikisht mund të nënkuptojë fundin e shtrimeve në spital me këtë virus dhe madje edhe vdekjet.

Ekspertët e EMA tani po shqyrtojnë të dhënat mbi cilësinë, sigurinë dhe efikasitetin e ilaçit të ri.

Sapo të përfundojnë testet, prodhuesi mund të aplikojë për miratim në BE, megjithëse EMA nuk ka dhënë një kornizë kohore për këtë.

Deri më tani, vetëm një medikament për trajtimin e COVID-19 është miratuar për përdorim në BE, ndërsa aplikimet për miratim janë dorëzuar për pesë ilaçe të tjera, katër prej të cilave janë aktualisht në shqyrtim./ /ervo/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.