LONDËR, 18 tetor /ATSH-AFP/ – Pavarësisht një fushate të fuqishme vaksinimi, Britania e Madhe po përballet me një numër infeksionesh COVID-19 ndër më të lartat në Evropë dhe në rritje, duke vënë në pikëpyetje politikën shëndetësore shumë liberale të qeverisë së Boris Johnson.
Për dy javë, rastet e reja ditore janë luhatur midis 35 000 dhe 45 000, me një shkallë incidence prej 410 raste për 100 000 banorë, që nga 12 tetori, shumë më e lartë se në pjesën tjetër të Evropës.
Vetëm Rumania, Serbia dhe vendet baltike janë në një situatë më të keqe.
“Shkalla e infeksionit në mesin e fëmijëve të shkollave të mesme është duke nxitur qartë këtë valë të qëndrueshme të infeksioneve të reja”, tha Prof. Simon Clarke nga Universiteti “Reading”.
Këto norma infeksioni po u afrohen atyre të valës së dhunshme të dimrit të kaluar, megjithëse vdekjet dhe shtrimet në spital mbeten shumë më të ulëta./ /ervo/
