TIRANË, 9 gusht/ATSH/ Rikonstruksioni i rrugës “Kalaja e Dalmacës” në lagjen nr. 5 të qytetit, apo siç njihet “Hardhijat e egra”, po ecën sipas ritmeve të parashikuara.
Kryetarja e bashkisë së Shkodrës, Voltana Ademi, bashkë me deputeten e zonës, Greta Bardeli, ka inspektuar punën e realizuar deri tani, teksa ka takuar edhe banorët, të cilët janë të kënaqur për investimin, por edhe për cilësinë e punimeve që po kryhen.
Ademi thekson se, “investimi nga të ardhurat e Bashkisë Shkodër ishte i domosdoshëm, në një zonë ku kanë munguar shërbimet”.
“Përfundimi i punimeve do të mundësojë ndërtimin e kanalizimeve të ujërave të bardha- KUB, kanalizimin e ujërave të zeza – KUZ, instalimet për ndriçimin rrugor, sipërfaqen asfaltike dhe sinjalistikën e duhur”, shton Ademi.
“Ky është investimi i radhës në këtë lagje të qytetit, i cili do të pasohet edhe me investime të tjera, duke nisur nga rruga ngjitur me “Kalaja e Dalmacës””, nënvizon Ademi.
“Përfundimi i projektit sjell një përmirësim të dukshëm sa i takon lëvizshmërisë së mjeteve motorike dhe këmbësorëve, por edhe mundëson përfitimin e shumë shërbimeve që kanë munguar në këtë zonë, e cila i është bashkuar qytetit pas vitit 1990”, thekson Ademi.
/r.e/
