TIRANË, 29 korrik/ATSH/ Gjyqi i padisë së kreut të PD-së, Lulzim Basha ndaj kreut të Bashkisë së Tiranës, Erion Veliaj për shpifje është shtyrë për në 24 shtator.
Në Gjykatën e Posaçme të Shkallës së Parë për Korrupsion dhe Krimin e Organizuar, u mbajt sot seanca e parë e pajtimit ku Basha u paraqit së bashku me avokatin e tij, ndërsa Veliaj u përfaqësuar nga avokati i tij.
Duke qenë se Gjykata e Tiranës shpalli moskompetencë për çështjen, Gjykata e Lartë caktoi Gjykatën e Posaçme si kompetente për shqyrtimin e kësaj çështje.
Basha ngriti padi në tetor të 2020-ës për shpifje dhe dëmtim të imazhit të tij nga Veliaj.
Pas seancës Basha nuk pranoi të flasë për mediet, por përfaqësuesi i tij ligjor, Indrit Sefa, tha se ai ka refuzuar që të pajtohet me kryebashkiakun e Tiranës.
“Procesi gjyqësor ka të bëjë me kërkesën e zotit Basha në lidhje me kërkesën penale si viktimë akuzuese ndaj zotit Erion Veliaj në kuadër të kërkesave që kemi ngritur më përpara. U zhvillua seanca e parë, seanca e pajtimit, ku zoti Basha erdhi vetë personalisht dhe deklaroi se nuk ka asnjë vullnet për t’u pajtuar me të akuzuarin Erion Veliaj”, tha përfaqësuesi ligjor i Bashës.
Avokati sqaroi më tej se Veliaj nuk ishte i pranishëm vetë, por përfaqësohej nga avokati dhe se edhe ai kishte refuzuar pajtimin.
/r.e/
