TIRANË, 9 korrik/ATSH/ Bashkia e Dimalit dhe ajo e Campobasos në Itali kanë rënë dakord për të nisur një bashkëpunim në fusha të ndryshme me përfitim të ndërsjelltë.
Gjatë vizitës në Itali, kryebashkiakja Juliana Memaj u prit në një takim nga kryetari i bashkisë së Campobasos, Roberto Gravina, me të cilin diskutoi mbi mundësitë e thellimit të bashkëpunimit ekonomik, politik dhe social midis dy qyteteve.
Lajmin e mirë e ka dhënë vetë kryetari i bashkisë së e Campobasos, i cili e ka vlerësuar si një takim mjaft të frytshëm.
“Këtë mëngjes pata kënaqësinë të takoja kryebashkiaken e Dimalit (Shqipëri), Juliana Memaj. Ishte një mundësi për të diskutuar shumë aspekte që qytetet tona kanë të përbashkëta, duke filluar me përvojën dhe përmirësimin e Street art, praktikat e mira për rritjen e produkteve bujqësore dhe rihapjen e turizmit vendas”, shkruan kryebashkiaku Roberto Gravina.
Ky bashkëpunim pritet shumë shpejt të finalizohet edhe me një marrëveshje binjakëzimi mes dy qyteteve./m.m/r.e/
