NION, 25 qershor /ATSH/ – Komiteti Ekzekutiv i UEFA-së vendosi të shfuqizojë rregullin për golin në transfertë në garat europiane duke filluar nga sezoni i ardhshëm 2021/22, sipas faqes zyrtare të UEFA-s.
Vendimi do të zbatohet në të gjitha garat e organizuara nga UEFA.
“Nëse dy skuadra kanë shënuar numër identik të golave pas ndeshjes së dytë, fituesi do të vendoset në dy zgjatje prej 15 minutash secila, dhe nëse rezultati mbetet barazim, fituesi do të vendoset përmes penalltive”, deklaroi UEFA.
Rregulli që një gol i shënuar në fushën kundërshtare vlen më shumë sesa një gol i shënuar në fushën vendase ka qenë në fuqi në garat europiane kombëtare dhe klubeve që nga viti 1965./ /os/
