TOKIO, 21 maj /ATSH-AFP/ – Qeveria japoneze miratoi sot vaksinat kundër COVID-19 të Moderna-s dhe AstraZeneca-s duke theksuar se kjo e fundit nuk do të përdorej menjëherë për shkak të rreziqeve të rralla, por me komplikacione të rënda.
Drita e gjelbër e autoriteteve do të mundësojë përshpejtimin e fushatës së vaksinimit në Japoni për të cilën qeveria është kritikuar ashpër dy muaj nga Lojërat Olimpike të Tokios 2020 (23 korrik-8 gusht).
Të paktën 2% e 125 milionë banorëve të Japonisë kanë marrë në fakt dy injektime të vaksinës Pfizer/BioNTech, e vetmja e miratuar nga qeveria japoneze deri tani.
Për t’u tregtuar në arkipelagun japonez, çdo prodhim shëndetësor duhet të bëhet objekt i studimeve klinike të plota në territoret japoneze, gjë që ka vonuar vënien në dispozicion të vaksinave në raport me vendet e tjera.
Liberalizimi i ngarkesave të para të Moderna-s do të përshpejtojë fushatën e vaksinimit, ndërkohë që kjo do të përkojë me hapjen javën e ardhshme të dy qendrave të vaksinimit në masë në Tokio dhe Osaka.
Japonia nuk do të përdorë menjëherë vaksinën e AstraZeneca-s për shkak të rasteve të rralla të trombozave të konstatuara në vendet e tjera./ /ec/
