TIRANË, 5 maj/ATSH/ “Rritja ekonomike e Shqipërisë do të jetë mbi nivelin 5% për vitin 2021”.
Kështu deklaroi sot në konferencën për shtyp Guvernatori i Bankës Qendrore, Gent Sejko ndërsa tha se “Banka e Shqipërisë, parashikon një vit më optimist seç kishte parashikuar në analizat e saj të mëparshme për vitin 2021”.
“Nga analiza e kaluar, ishte parashikuar një rritje në nivelin 4,9 %, sot jemi në një parashikim të ri, se këtë vit rritja ekonomike do të jetë mbi 5 %”, tha Sejko
Sipas tij, një sezon turistik i mirë, rritja e investimeve, eksporteve, rritja e konsumit, por edhe niveli në rritje i financimit të kreditimit nga sektori bankar, i cili ka treguar një qëndrueshmëri mjaft të mirë në raport me goditjet e krizës, janë faktorët që mbështesin rritjen e ekonomisë.
Pritshmëritë tona, theksoi Guvernatori Sejko, bazohen në faktin që niveli i përhapjes së epidemisë Covid po vjen në rënie.
Ai tha se, shifrat dhe treguesit tregojnë për një rritje të mirë ekonomike në 2021 dhe në vazhdim në 2022 e më tej.
“Informacioni i ri i analizuar tregon se ritmi i rimëkëmbjes së aktivitetit ekonomik u përshpejtua dhe perspektiva e zhvillimit ka ardhur drejt përmirësimit gjatë dy tremujorëve të fundit. Këshilli Mbikëqyrës vlerëson se kjo ecuri pasqyron: fleksibilitetin e ekonomisë shqiptare dhe qëndrueshmërinë e sistemit të saj financiar; mbështetjen e siguruar nga stimuli monetar, financiar dhe fiskal; si dhe, së fundmi, reduktimin e kufizimeve dhe rritjen e besimit në përgjigje të procesit të vaksinimit”, deklaroi Sejko.
/r.e/
