OSLO, 9 mars /ATSH-AFP/ – Norvegjia autorizoi sot administrimin e vaksinës antiCOVID-19 të AstraZeneca për moshat mbi 65 vjeç, një vendim i marrë pas informacioneve të reja për këtë vaksin dhe që do të përshpejtojë vaksinimin për personat e moshuar.
Ashtu si disa vende të tjera europiane, mbretëria nordike kishte kufizuar injektimin e vaksinës nga laboratori anglo-suedez tek moshat nën 65 vjeç, për mungesë të dokumentacionit të mjaftueshëm për efektet e saj tek të moshuarit.
Pas Francës, Gjermanisë dhe Italisë, Instituti Norvegjez i Shëndetit Publik ka rekomanduar, megjithatë, shtrirjen e aksesit në vaksinë për të gjithë njerëzit mbi 18 vjeç, në bazë të studimeve britanike që tregojnë efektivitetin e saj tek të moshuarit.
Qeveria njoftoi të martën se do të ndiqte këtë këshillë.
Norvegjia dëshiron gjithashtu të zgjasë intervalin midis injektimit të dy dozave të vaksinave Pfizer/BioNtech dhe Moderna nga tre në gjashtë javë, një masë ende në varësi të dritës së gjelbër përfundimtare nga Instituti i Shëndetit Publik.
Ky i fundit ishte gjithashtu përgjegjës për studimin nëse kjo periudhë mund të zgjatet përtej gjashtë javëve, një hapësirë e shtuar e injeksioneve duke bërë të mundur rritjen e shpejtë të numrit të marrësve për herë të parë.
“Tani presim që të gjithë të rriturve do t’ju ofrohet vaksina brenda ose gjatë verës”, theksoi në Parlament, shefja e qeverisë, Erna Solberg./ /ec/
