TIRANË, 8 mars /ATSH/ Ish-deputetja e PD-së, Jorida Tabaku deklaroi sot se, “në 8 vjet, Edi Rama e shndërroi vendin në një shkretëtirë për të rinjtë dhe profesionistët”.
“Për shkak të keqqeverisjes 8-vjeçare, vendet e punës u mbyllën për shqiptarët”, tha Tabaku në një deklaratë për mediat.
“Edi Rama zgjodhi të ndajë paratë dhe pasuritë e vendit me një grusht njerëzish, duke vrarë shpresën se në vend secili mund të ndërtonte një jetë të qetë dhe një të ardhme të sigurte. Edi Rama që ka dështuar për 8 vite dhe e ka lënë Shqipërinë në vendnumëro nuk mund të sjellë ndryshimin që i duhet vendit për të patur sukses”, tha ajo.
“Ndryshimi që kemi nevojë është një qeveri që kujdeset për ju. Pagat duhet të jenë më e larta. Shteti duhet të sigurojë më shumë vende pune. Ju meritoni shërbime më të mira shëndetësore dhe arsimim më të mirë për fëmijët tuaj. Qeveria duhet të garantojë që vendi ynë të jetë më i mire, në mënyrë që fëmijët tanë të mos ikin jashtë”, tha Tabaku.
“Për të patur sukses, ne duhet të ndërrojmë qeverinë, sepse me Ramën kemi ngelur në vendnumëro për 8 vite. Nuk ka rëndësi kush është në listën e Ramës apo kush është poshtë tij. Ajo që ka rëndësi është që Rama është problemi i Shqipërisë dhe pa larguar atë, nuk do të ketë ndryshim”, theksoi ajo.
“Lajmi i mirë është se njerëzit e kanë kuptuar këtë. E shohim entuziazmin në rrugë. Na e thonë qytetarët në çdo ditë, në çdo takim dhe në çdo cep të Shqipërisë. Shqiptarët duan ndryshim. Qytetarët shqiptarë duan një qeveri të re që të kujdeset për ta. Ata janë lodhur nga premtimet boshe të Ramës, të cilat, të gjithë e dimë se nuk do t’i mbajë. Është koha për ndryshim!”, tha Tabaku.
/r.e/
