Përfundon faza e parë e restaurimit të banesës së piktorit Sali Shijakut

TIRANË, 18 janar/ATSH/ Ministrja e Kulturës, Elva Margariti inspektoi sot përfundimin e fazës së parë të punimeve për restaurimin e banesës së piktorit të njohur Sali Shijaku, e cila kishte pësuar dëmtime për shkak të tërmetit të vitit që shkoi.
Gjatë inspektimit, ministrja Margariti u shpreh se “puna, por edhe dëshira për të shijuar veprat e piktorit na ka çuar shpesh në shtëpinë e Sali Shijakut këto kohë”.
“Falë përkushtimit të specialistëve pranë Institutit Kombëtar të Trashëgimisë Kulturore, Drejtorisë Rajonale të Tiranës, por edhe bashkëpunimit me banorët e shtëpisë, u arrit realizimi i një sërë punimesh shumë të rëndësishme për jetëgjatësinë e monumentit, që nga vendosja e trarëve, ndërrimi i dyshemesë, i grilave, për të nisur një fazë të dytë, atë të restaurimit të çatisë”, – theksoi Margariti.
Banesa e Shijakasve, monument kulture i kategorisë I është ndërtuar në gjysmën e parë të shek. XIX dhe paraqet fazën më të zhvilluar të banesës tiranase së “shtëpisë së zjarrit”. E ndodhur në rrugën “Vildan Luarasi”, Nr. 16, është shembull tipik i banesës tiranase. Ajo ka planimetri katërkëndëshe të rregullt me dy kate. Dhoma kryesore e saj është shndërruar në një galeri arti, ku janë ekspozuar veprat e piktorit Sali Shijaku.
Kjo banesë është një nga pikat më të vizituara në Tiranë.

/k.s/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.