TIRANË, 15 dhjetor/ATSH/ Me Buxhetin 2021 dhe angazhimin për rimëkëmbjen e çdo familjeje të ardhurat për banor do të arrijnë 5687 USD në vit.
Kështu deklaroi sot ministrja e Ekonomisë dhe Financave, Anila Denaj.
Ministrja Denaj tha se në vitin 2006-2013 të ardhurat mesatare për frymë ishin 4030 USD, në vitin 2014-2020 ishin 4717 USD dhe në 2021 do të jenë 5687 USD për frymë.
“Politikat buxhetore në vite kanë mbështetur rritjen e mirëqenies qytetare. Së bashku, përballuam me sukses dy goditjet e njëpasnjëshme, me reagim të shpejtë në mbështetje të më shumë se 300 000 individëve me Paketat Mbështetëse të qeverisë; më shumë se 100 000 bizneseve të vogla me lehtësitë fiskale gjatë pandemisë dhe tatimfitimin 0”, – theksoi Denaj.
Ministrja Denaj u shpreh se “më shumë se 1500 mijë bizneseve të mesme e të mëdha u mbështetën nëpërmjet skemave të garancisë sovrane dhe nxitjes së punësimit”./k.s/r.e/
