TIRANË, 29 tetor /ATSH/ Deputeti i Partisë Socialiste Alket Hyseni u shpreh sot se, “ndryshimet në Ligjin për Policinë e Shtetit që përfshijnë, dy iniciativa në një amendament, synojnë të rrisin rolin e Policisë së Shtetit në mision e saj”.
Gjatë fjalës së tij në Kuvend, Hyseni tha se, “Policia e Shtetit është institucioni më i vlerësuar në Shqipëri nga të gjitha sondazhet, ndaj duhet t’i japim mbështetjen e duhur. Ndryshimet ligjore i hapin rrugë policisë së shtetit për kryerjen e disa veprimeve hetimore paraprake, veprime parandaluese, vëzhguese të cilat çojnë në krijimin e provës, dhe rrisin goditjen ndaj krimit të organizuar, për gjurmimin e parave të pista të krimit”.
“Këto kompetenca vijë në përputhje me Kodin e Procedurës Penale dhe janë konsultuar me të gjithë aktorët e fushës vendas dhe të huaj. Këto ndryshime adresojnë parimet bazë të Prokurorit të Përgjithshëm dhe veçanërisht zyrës së BE-së. Kemi sjelli një amendament me dy ndryshime bazike që përmirësojnë dukshëm ligjin për Policinë e Shtetit, duke synuar ruajtjen rolit të Prokurorisë dhe ruajtjen e parimeve të Kodit të Procedurës Penale”, tha ai.
Hyseni theksoi se, kemi sjellë një institucion të ri me këtë ligj, Komitetin për Politikat dhe Parandalimin e Krimit të Organizuar, një komitet që funksionon pranë Ministrisë së Brendshme me përfaqësues nga institucionet e linjës.
Gjithashtu tha ai, “duke implementuar edhe disa rekomandime të OSBE/ ODIHR ne e bëjmë me ligji detyrat e policisë në mirë administrimin e fushatës dhe proceseve zgjedhore që ka qenë të parashtruara vetëm në Kodin Zgjedhor”.
“Ky ndryshim është në kuadër të marrëveshjes së 5 qershorit që bëmë me opozitën, që në fakt na la mbrapa me disa marrëveshje. Jemi në rrugën e duhur për të përmbushur detyrimet tona që burojnë nga marrëveshja e 5 qershorit dhe detyrimet Kushtetuese dhe të shpresojmë që opozita e rrugës të mos e pengojë ashtu siç e ka bërë duke penguar çdo reformë dhe ndryshimet në Kodit Zgjedhor”, përfundoi Hyseni. /a.a//r.e/
