TIRANË, 13 tetor /ATSH/ Konferenca e Kryetarëve miratoi sot programin e punës së Kuvendit për periudhën 19 tetor-27 nëntor 2020 dhe kalendarin trejavor të punimeve për periudhën 19 tetor-6 nëntor 2020.
Nën drejtimin e Kryetarit të Kuvendit, Gramoz Ruçi, u zhvillua mbledhja e Konferencës së Kryetarëve.
Mbledhja miratoi programin e punës së Kuvendit për periudhën 19 tetor-27 nëntor 2020 dhe kalendarin trejavor të punimeve për periudhën 19 tetor-6 nëntor 2020.
Konferenca vendosi zhvillimin e seancave plenare në datat 22 tetor, dhe 5 nëntor 2020. Më 29 tetor nuk do të zhvillohet seancë plenare për arsye se java 26-30 tetor është Java e Gjelbër.
Konferenca e Kryetarëve vendosi që seancat plenare do të vazhdojnë të zhvillohen me praninë fizike të deputetëve, duke respektuar protokollet e sigurisë për mbrojtjen nga pandemia COVID-19.
Konferenca e Kryetarëve vendosi që mbledhjet e komisioneve do të vazhdojnë të zhvillohen online.
Në përfundim të mbledhjes, Kryetari i Kuvendit, Gramoz Ruçi, nënvizoi se Plani i Veprimit i Kuvendit për Integrimin Europian duhet të ndiqet me vëmendjen e duhur nga komisionet.
Gjithashtu, Kryetari i Kuvendit, Gramoz Ruçi, njoftoi Konferencën se më 28 tetor Kuvendi i Shqipërisë, në partneritet me Lëvizjen për të Luftuar Antisemitizmin, do të organizojnë Forumin e Ballkanit 2020 Kundër Antisemitizmit.
Mbledhja e zhvillua me anë të mjetit të komunikimit elektronik (Cisco Webex).
/gj.mima//a.a//r.e/
