Rama reagon për deklaratën e Vulin

TIRANË, 3 tetor /ATSH/ – Kryeministri Rama ka reaguar sot ndaj një deklarate të ministrit serb të Mbrojtjes, Aleksandar Vulin, sipas të cilit, me vënien në funksionim të Zyrës Operative të Kosovës në doganën e Portit të Durrësit shefi i qeverisë shqiptare po punonte për krijimin e Shqipërisë së Madhe.

”A është kjo e vërtetë apo është një meme që tallet me trutharët dhe gojëndyrët që për shekuj mbajtën të gjithë rajonin tonë në errësirë?”, shkruan Rama në një reagim drejtuar presidentit serb, Aleksandar Vuçiç.

”Unë uroj shumë që kjo të jetë një meme, përndryshe kjo do të ishte një shfaqje e dëshpëruar e të menduarit mjeran që duhet ta dënoni pa asnjë dyshim!”, thekson ai.

Ministrit serb i Mbrojtjes, Aleksandar Vulin tha se ”duke deklaruar se porti i Durrësit do të jetë i Kosovës, Edi Rama vazhdoi punën e tij në krijimin e një “Shqipërie të Madhe”.

”Shqipëria e Madhe është një lajm i katastrofës së madhe, thyerjes dhe shkatërrimit të shteteve dhe kombeve në Ballkan. Vetëm serbët e bashkuar mund të ndalojnë “Shqipërinë e Madhe”… Atë që ju u jepni shqiptarëve nuk mund t’ua ndaloni serbëve’’, tha Vulin./ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.