TRIPOLI, 1 shtator /ATSH-AFP/ – Kreu i diplomacisë europiane, Josep Borell e përshkroi sot çështjen libiane si përparësinë kryesore, gjatë një udhëtimi në Tripoli ku diskutoi mënyrat për forcimin e armëpushimit dhe rifillimin e bisedimeve midis fuqive rivale.
“Libia mbetet përparësia kryesore e Bashkimit Europian”, shkroi ai në një postim në Twitter, pas një takimi me kreun e GNA-së Fayez al-Sarraj dhe anëtarët e kabinetit të tij.
“Ne e mirëpresim marrëveshjen e fundit të armëpushimit dhe vazhdojmë të mbështesim dialogun dhe zgjidhjen politike”, vazhdoi Përfaqësuesi i Lartë i BE-së për Punët e Jashtme.
Vendet kryesore të përfshira në krizën libiane u zotuan gjatë një takimi në janar, në Berlin, për të respektuar një embargo të armëve të OKB-së dhe për të ndaluar çdo ndërhyrje në punët e brendshme të Libisë./ /ervo/
