PRISHTINË, 15 prill /ATSH/ U krijua në Kosovë, Grupi Koordinues për COVID-19, i cili ka për qëllim lehtësimin e pasojave që do t’i shkaktojë ekonomisë pandemia e koronavirusit dhe adresimit të problematikave që i kanë dalë sektorit privat.
Këshilli Kombëtar për Zhvillim Ekonomik (KKZHE) ka diskutuar ditën e djeshme hapat e mëtejshëm që duhen ndërmarrë, me qëllim zbutjen e ndikimit negativ në ekonominë e vendit të shkaktuar nga pandemia COVID-19.
Në këtë takim u identifikuan prioritetet dhe sfidat kryesore lidhur me situatën e krijuar nga pandemia COVID-19, që do të ndikojnë në menaxhimin e gjendjes ekonomike të krijuar në Kosovë.
Kryeministri në detyrë Albin Kurti tha se qeveria në detyrë ka marrë masat për t’i ardhur në ndihmë ekonomisë përmes pakos emergjente fiskale, ndërkohë që është duke planifikuar paketën e dytë – ajo e rimëkëmbjes ekonomike, e cila do të jetë më e madhe se paketa emergjente dhe do të ketë kohështrirje shumë më të gjatë.
Ministrja në detyrë e Ekonomisë, Rozeta Hajdari, theksoi se si qeveri do të përqendrohen më shumë për mbështetjen, rimëkëmbjen e bizneseve, dhe zhvillimin e potencialit për krijimin e vendeve të punës.
Ajo përmendi se fondet e projektit të financuar nga Banka Botërore “Konkurrueshmëria dhe Gatishmëria për Export” me afër 10 milionë euro të cilat janë rialokuar për përkrahje direkte për bizneset, për të mbuluar humbjet.
Po ashtu, në përgjegjësinë dhe përkrahjen e ministres për sektorin privat, ministrja Hajdari ka kërkuar mbështetjen e BE-së për të ndihmuar mbulimin e dëmeve nga pandemia COVID-19.
“Nga BE mund të vihet në dispozicion deri në 160 milionë euro përmes ndihmës makrofinanciare, mbështetjes buxhetore, IPA grante, sektorit të mbështetjes private, bujqësisë si dhe lehtësimin e varfërisë. Ministria e Ekonomisë ka marrë të gjithë hapat e nevojshëm për të siguruar furnizimin e rregullt të tregut me drithë dhe miell, dhe për të stabilizuar çmimin e produkteve në treg”, tha Hajdari.
Ministri në detyrë i Financave dhe Transfereve, Besnik Bislimi, theksoi se Pakoja e Fiskale Emergjente mund të realizohet brenda buxhetit aktual të Kosovës, pa aprovimin e Kuvendit për pezullimin e rregullave fiskale, megjithëse kjo do të ketë pasoja afatgjata në buxhetin e shtetit.
Ndërsa, Berat Rukiqi, kryetari i Odës Ekonomike të Kosovës, adresoi rëndësinë e sqarimeve të vendimeve të paqarta dhe sugjeroi krijimin e një portali të unifikuar dhe të përditësuar me informata të vendimeve të Qeverisë në detyrë.
Gjithashtu, Rukiqi bëri të ditur se pakoja e radhës duhet të jetë në koordinim me të gjithë dhe duhet synohet që përmes saj të sigurohet minimizimi i humbjeve dhe jo kompensimi i tyre.
Arian Zeka, drejtori i Odës Ekonomike Amerikane të Kosovës tha se duke pasur parasysh zhvillimin e deritanishëm të rrethanave, theksoi se, sipas tij, ka pasur dialog në mes të qeverisë dhe odave, por jo koordinim. Si pasojë e kësaj, ai vlerësoi se një pjesë e madhe e rekomandimeve të bizneseve nuk janë marrë parasysh në pakon emergjente.
Pas rekomandimeve specifike që i prezantoi në detaje, Skënder Krasniqi, kryetari i Odës së Afarizmit, deklaroi se ai mbështet fuqishëm që pakoja e re të bëhet në koordinim më të ngushtë në mes të qeverisë dhe sektorit publik, duke shpresuar që një gjë po mundësohet përmes KKZHE-së.
Në përfundim të këtij takimi, pas votimit, u aprovua propozimi për themelimin e Grupit Koordinues për COVID-19.
Ky grup koordinues do të ketë për qëllim trajtimin dhe adresimin e çështjeve ekonomike dhe problemeve që ka sektori privat, si rezultat i përballjes me pandeminë COVID-19.
Ky grup do të kryesohet nga ministrja në detyrë e Ekonomisë, Rozeta Hajdari. Një grup i nivelit të tillë do të punojë në mënyrë më efikase për të marrë vendimet e duhura në bazë të analizave dhe diskutimeve konstruktive ndërinstitucionale për të kontribuar në përpilimin e masave të cilat i përgjigjen nevojave të sektorit privat. /KosovaPress/
