TIRANË, 6 prill /ATSH – A. Fortuzi/ Kryeministri Edi Rama, gjatë një komunikimi sot me qytetarët, ka nënvizuar se bonusi i bebes nuk do të preket dhe do të vijojë të jepet normalisht.
Kryeministri Edi Rama, duke i’u përgjigjur interesit të qytetarëve lidhur me çështjen e bonusit të bebes, në kuadër të masave të marra nga qeveria për përballimin e pandemisë COVID 19, nënvizoi se nuk do të ketë asnjë ndryshim.
“Bonusi i bebeve s’ka asnjë ndryshim dhe nuk do të ndërpritet asnjë ditë dhe nuk do të preket asnjë qindarkë për të porsalindurit. Do të vazhdojmë të japim bonusin e bebes në të njëjtën rrugë”, – tha Rama.
Sa i takon fondeve të BE, Rama tha se paratë nuk janë në valixhe, por kanë synim sistemin tonë shëndetësor në luftën ndaj COVID-19.
“Nuk ka fonde të BE në valixhe që kanë ardhur këtu dhe të marrësh ti lekë, fondi i BE është për të mbështetur qeverinë shqiptare, një fond 50 milionë euro që vjen në mars të vitit të ardhshëm dhe pjesa e parë nuk ka ardhur ende dhe kur të vijë nuk vjen kesh, por është fond për sistemin tonë shëndetësor”, – tha Rama. /r.e/
