TIRANË, 27 shkurt /ATSH/ – Larja e shpeshtë e duarve, përdorimi i maskave vetëm kur shfaqen simptoma gripale apo mospërdorimi i antibiotikëve pa rekomandimin e mjekut, janë disa prej këshillave bazë që mësuesit kanë dhënë çdo ditë nëpër shkolla për të orientuar nxënësit se si të parandalojnë përhapjen e viruseve.
Ministrja e Arsimit, Sportit dhe Rinisë, Besa Shahini nënvizon faktin se çdo ditë nëpër shkolla, mësuesit po orientojnë nxënësit se si të parandalojnë përhapjen e viruseve duke u bazuar në rekomandimet më të mira të Ministrisë së Shëndetësisë dhe Mbrojtjes Sociale (MSHMS).
Larja e shpeshtë e duarve si masa kryesore që duhet të ndërmerret, përdorimi i maskave vetëm kur shfaqen simptoma gripale apo mos-përdorimi i antibiotikëve pa rekomandimin e mjekut, janë disa prej këshillave bazë që jepen gjatë këtyre orëve edukuese.
“Deri tani nuk ka asnjë rast të koronavirusit në Shqipëri. Por, edhe nëse do të ketë në të ardhmen, jemi plotësisht gati ta përballojmë bashkërisht”, thekson ministrja Shahini.
/gj.mima/
