TIRANË, 4 shkurt/ATSH/ Bashkia e Kurbinit, një ndër më të prekurat nga tërmeti i fortë që goditi vendin tonë me magnitudë 6.4 të shkallës Rihter mëngjesin e 26 nëntorit, ka ngritur 4 zyra në ndihmë të qytetarëve për aplikimet online të Programit të Rindërtimit.
Kryetarja e bashkisë së Kurbinit, Majlinda Shqalsi Cara në një prononcim për ATSH-në bëri të ditur se deri tani janë kryer 206 aplikime gjithsej për të përfituar nga Programi i Rindërtimit.
Sipas Carës, një zyrë funksionale është në Laç, tek Pallati i Kulturës, një në njësinë administrative Mamurras, një në njësinë administrative Milot, si dhe një në njësinë administrative Fushë-Kuqe.
Ajo shpjegoi se procedura është e thjeshtë dhe aplikimi bëhet nga punonjësi i bashkisë, ndërsa qytetari që paraqitet firmos në fund të procesit, në formularin e plotësuar.
Qytetarët mund të zgjedhin nga programi i strehimit (RDS4-RDSS), granti për rindërtim (GR), granti për rikonstruksionin e banesave të dëmtuara (DS1-DS2-DS3) sipas aktkonstatimeve.
Kryetarja e kësaj bashkie, Cara apeloi qytetarët të paraqiten pranë zyrave të ngritura, ku do të asistohen për plotësimin e aplikimit.
“Ftoj çdo qytetar të Kurbinit që ka patur dëmtime në banesë nga tërmeti i datës 26 nëntor të paraqitet pranë këtyre zyrave për t’u asistuar në plotësimin e aplikimit online nga stafi i angazhuar për këtë çështje”, deklaroi Cara./a.gjonaj/
