BRUKSEL, 29 janar /ATSH-AFP/- “Ne nuk do të jemi kurrë larg”, u premtoi sot eurodeputetëve britanikë presidentja i Komisionit Europian, Ursula von der Leyen pak para votimit për ratifikimin e traktatit të Brexit mes Mbretërisë së Bashkuar dhe BE-së, dy ditë para ndarjes.
“Ne do t’i kushtojmë gjithë energjinë tonë, 24 orë në ditë, 7 ditë në javë, për të arritur rezultate në negociatat për marrëdhëniet e ardhshme”, vazhdoi von der Leyen, para deputetëve të mbledhur në seancën plenare në Bruksel.
Dy ditë para Brexit-it, Parlamenti Europian ratifikoi sot me shumicë dërrmuese votash, marrëveshjen e tërheqjes së Britanisë së Madhe nga BE.
Pa surpriza të shumta, eurodeputetët dhanë miratimin e tyre me 621 vota pro, 49 kundër dhe 13 abstenime.
Ky ishte hapi i fundit i madh në ratifikimin e marrëveshjes, tre vjet e gjysmë pas referendumit për Brexit-in në Britaninë e Madhe.
Menjëherë pas votimit, i cili vulosi largimin e eurodeputetëve britanikë, shumë deputetë i dhanë dorën njëri-tjetrit dhe kënduan këngën skoceze “Auld Lang Syne” (Është veç një mirupafshim)./ /ervo/
