HAGË, 26 janar /ATSH-AFP/ – Kryeministri holandez kërkoi sot falje në emër të qeverisë për persekutimin e hebrenjve në Holandë gjatë Luftës së Dytë Botërore.
“Tashmë që të mbijetuarit e fundit janë ende mes nesh, kërkoj sot falje në emër të qeverisë për veprimet e autoriteteve të asaj kohe”, deklaroi Mark Rutte.
Ai u shpreh gjatë një homazhi kombëtar për viktimat e Holokaustit, një ditë para 75-vjetorit të çlirimit të kampit të përqendrimit të Aushvicit nga Ushtria e Kuqe më 27 janar 1945.
Është hera e parë që qeveria kërkon falje për persekutimin e hebrenjve në Holandë dhe për deportimin e tyre masiv drejt kampeve të vdekjes.
Nga 140 000 hebrenj që numëronte vendi, 102 000 nuk kanë mbijetuar./ /ec/
