SPORT – Rusia përjashtohet 4 vite nga garat e mëdha botërore

GJENEVË,  10 dhjetor /ATSH-AA/ – Agjencia Botërore e Antidopingut (WADA) ka përjashtuar për katër vite Rusinë nga olimpiadat dhe kampionatet botërore me arsyetimin për moszbatim të rregullave të dopingut.

Duke folur pas mbledhjes së bordit drejtues në Lozanë të Zvicrës, zëdhënësi i WADA-s, James Fitzgerald, tha se rekomandimet për pezullimin e Rusisë nga organizimet e mëdha sportive të nivelit global janë miratuar njëzëri.

Sipas vendimit, himni dhe flamuri i Rusisë nuk do të jenë pjesë e Lojërave Olimpike 2020 në Tokio dhe në Kampionatin Botëror FIFA 2022.

Megjithatë, sportistët rusë kanë mundësi të marrin pjesë në Tokio më 2020 me flamurin olimpik nëse kalojnë me sukses testet e dopingut.

Rusia duhet që brenda 21 ditëve të pranojë vendimin e WADA-s ose ta ankimojë në Gjykatën e Arbitrazhit Sportiv (CAS).

Nga ana tjetër, përkundër vendimit, Rusia do të mund të marrë pjesë në Kampionatin Europian në futboll UEFA 2020 si njëra nga organizatoret e garës, pasi UEFA nuk gjendet në listën e organizatave të mëdha të WADA-s.

Ndryshe, Rusia ishte pezulluar edhe në vitin 2015 me arsyetimin se sportistët kishin pranuar doping sistematik të mbështetur nga shteti gjatë Olimpiadës Dimërore të vitit 2014 në Soçi.

Në Olimpiadën Dimërore të vitit 2018 në Pyeongchang, 168 sportistë rusë kishin garuar të pavarur./ /os/ a.jor.

 

 

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.