TIRANË, 25 korrik/ATSH/ Diplomatja shqiptare në Shtetet e Bashkuara të Amerikës, Floreta Faber zhvilloi një takim pune me ambasadorin e Barbadosit në Uashington DC, Olen Lynch nga ku edhe diskutuan thellimin e bashkëpunimin mes dy palëve.
Ambasadores Floreta Faber e cilësoi takimin e punës të frytshëm, ku së bashku me homologun e saj diskutuan mbi mundësitë e bashkëpunimit në sektorin ekonomik dhe atë turistik.
“Një takim pune i frytshëm ndërmjet ambasadores Floreta Faber dhe ambasadorit të Barbadosit në Uashington DC Olen Lynch. Palët diskutuan dhe nxorën në pah mundësitë e bashkëpunimit ndërmjet vendeve tona në sektorin ekonomik dhe turizmit si edhe fushave të tjera me interes reciprok”, thuhet në faqen zyrtare të Ambasadës shqiptare në Shtetet e Bashkuara të Amerikës.
Ndër të tjera, palët dakordësuan që ky bashkëpunim të fillojë me lehtësimin e procesit të vizave i cili do i hapë rrugë realizimit të bashkëpunimit në fusha të tjera.
