TIRANË, 30 Qershor /ATSH/ -Ministri në detyrë për Europën dhe Punët e Jashtme, Gent Cakaj ka votuar sot tek qendra e votimit tek Shkolla Pedagogjike në kryeqytet.
Pas votimit ai ka theksuar se, “rëndësia e zgjedhjeve të sotme është e dyfishtë”.
“Nga njëra anë, manifestimi i vullnetit të lirë me të drejtën e votës për të zgjedhur strukturat e pushtetit vendor dhe, nga ana tjetër, dhënia e një shembulli historik se qëndrueshmëria e institucioneve dhe kalendari kushtetues i Shqipërisë është përmbi llogaritë e ngushta të çfarëdo partie politike!”, është shprehur Cakaj.
Sipas tij, “mbarëvajtja e zgjedhjeve vendore është pothuajse aq e rëndësishme sa mbajtja e tyre kësaj radhe. Nuk duhet të ketë asnjë pengesë në të drejtën e qytetarëve për të zgjedhur dhe për t’u zgjedhur. Sjellja e përgjegjshme, paqësore dhe e qetë e gjithsecilit është detyrim qytetar dhe detyrim kombëtar”.
Ai ka shprehur, “inkurajim për pjesëmarrje sa më masive për të gjithë shqiptarët për ta bërë Shqipërinë më të mirë”.
/gj.mima/ /a.g/
