TIRANË, 23 qershor /ATSH-A.ALLA/ – “Fjalët e mia janë të tepërta, pasi më shumë se çdo fjalë e imja flasin investimet e bëra në Libohovë. Këto ndryshime të shumta kanë ndryshuar faqen e Libohovës”, – u shpreh kandidatja e Partisë Socialiste për Libohovën, Luiza Mandi gjatë takimit elektoral në Gjirokastër.
Mandi tha se, “kemi ndryshuar faqen e qytetit të Libohovës dhe kemi ndërtuar aty një pedonale fantastike. Gjithashtu janë bërë investime në infrastrukturën rrugore, në bujqësi. Të gjitha këto investime janë kryer gjatë 4 viteve të fundit si kurrë më parë, të cilat ishin harruar prej 24 vitesh nga qeverisja e mëparshme”.
“Ne kemi nevojë akoma për më shumë investime, pasi janë deficitet e viteve të tëra që nuk mund të mbulohen me këtë 4-vjeçar. Ju ftoj të gjithëve të mbështesim Partinë Socialiste për të realizuar një sërë investimesh të tjera që ne kemi nevojë. Janë investime për ujësjellësin, për rrugën e Zagorisë dhe një sërë investimesh të tjera”, – përfundoi kandidatja e Partisë Socialiste për Libohovën, Luiza Mandi. /j.p/
