VJENË, 27 maj /ATSH-AFP/ – Partia e ekstremit të djathtë austriak, FPÖ do të bashkojë votat e saj me ato të së majtës për të shkarkuar kancelarin konservator, Sebastian Kurz gjatë mocionit të mosbesimit që do të zhvillohet sot, njoftoi lideri i ri i kësaj partie, Norbert Hofer.
”FPÖ do të miratojë mocionin e mosbesimit’’, njoftoi ai pas një takimi të strukturave drejtuese të partisë në Vjenë.
Partia Social-demokrate njoftoi të dielën në mbrëmje se edhe ajo do të votonte gjithashtu pro mocionit.
Këto dy forca politike zotërojnë së bashku shumicën absolute. Koalicioni ”e djathtë-ekstremi i djathtë” në pushtet në Austri u shpërbë një javë më parë, pas publikimit të një video komprometuese për FPÖ, ndërsa zgjedhjet e parakohshme legjislative parashikohen të mbahen në shtator./ /v.b/ a.jor.
