TIRANË, 27 maj /ATSH/ – Arba Kokalari do të jetë deputetja e parë shqiptare që ulet në Parlamentin Europian, e zgjedhur me votat e qytetarëve suedezë. Partia e saj Moderatore mori 17.6 % të të gjitha votave, rezultat ky që i garanton 4 deputetë, mes tyre dhe asaj të shqiptares.
Meta: Arba Kokalari, i bën të lumtur të gjithë shqiptarët
Presidenti i Republikës, Ilir Meta ka uruar Arba Kokalarin për zgjedhjen e saj si eurodeputete në Suedi. “Arba Kokalari, shqiptarja e parë eurodeputete, i bën të lumtur të gjithë shqiptarët dhe meriton mirënjohjen e tyre, jo vetëm si model suksesi në Suedi, por edhe përfaqësimi dinjitoz në Europën e Bashkuar”, shprehet Meta.
Lidhur me këtë arritje historike për shqiptarët ka reaguar dhe ministri i Shtetit për Diasporën, Pandeli Majko, i cili shprehet se, “Arba Kokalari do të jetë deputetja e parë shqiptare që ulet në Parlamentin Europian. Ajo është zgjedhur për të përfaqësuar Suedinë në PE, në zgjedhjet që u mbajtën dje”.
Kryetari i Partisë Demokratike, Lulzim Basha ka uruar Arba Kokalarin për zgjedhjen e saj si eurodeputetja e parë shqiptare
“Të dashur miq, sapo urova në telefon Eurodeputeten e parë shqiptare, shqiptaro-suedezen Arba Kokalari që u konfirmua pak çaste më parë si fituesja e mandatit të eurodeputetes për partinë e Moderatëve suedezë, simotrës tonë në Partinë Popullore Europiane!”, shprehet Basha.
“Natë e paharrueshme për Arbën dhe familjen e saj, natë fitore për Moderatët që konfirmuan 4 eurodeputetë dhe natë historike për të gjithë ne shqiptarët që inagurojmë me Arba Kokalarin praninë shqiptare në ulëset e Parlamentit Europian!”, thekson kreu i PD.
Krenar dhe i lumtur me fitoren e Arbës, Basha i shpreh mirënjohjen e tij të gjithë bashkatdhetarëve tanë Suedi që me votën e tyre e mundësuan këtë moment historik.
Arba Kokalari, ka lindur në Shqipëri dhe më pas u zhvendos drejt Suedisë, pasi i ati, nipi i Musine Kokalarit kishte funksionin e ambasadorit të Shqipërisë. Për shumë vite Kokalari ka qenë e angazhuar me rininë e PPE-së dhe disa herë ka qenë zëvendëspresidente.
Ndërkohë që vetë Kokalari ka ndarë disa foto dhe në rrjetet sociale, teksa shprehet shumë e lumtur për këtë arritje të saj.
/gj.mima/ /a.g/
