ATHINË, 10 maj /ATSH-ANSA/ – Dy javë përpara votimeve për Parlamentin Europian, qeveria e kryeministrit grek, Aleksis Cipras i mbijetoi një vote mosbesimi në parlament, kërkuar nga opozita e partisë ”Demokracia e re”.
Pas tri ditëve të një debati të zjarrtë, dje në mbrëmje vonë, parlamenti grek hodhi poshtë votën e mosbesimit me 153 vota pro dhe 136 kundër.
SYRIZA ka 145 deputetë nga 300, por tetë deputetët e pavarur, votuan pro qeverisë.
Mocioni i mosbesimit u bë kundër zëvendësministrit të Shëndetësisë, Pavlos Polaqis, pasi ky i fundit kishte konfirmuar se një kandidat i ”Demokracisë së re” për zgjedhjet europiane, Stelios Kimboropulos, i cili lëviz me karrige mbi rrota, kishte pasur një trajtim preferencial për të mbajtur vendin e punës në sektorin e shëndetësisë publike për shkak të paaftësisë fizike të tij.
Më 26 maj në Greqi, përveç zgjedhjeve europiane, zhvillohen edhe ato lokale./ a.jor.
