TIRANË, 16 prill/ATSH-A.Fortuzi/- Komisioni i Pavarur i Apelimit ka lënë në fuqi vendimin e Komisionit të Pavarur të Kualifikimit për shkarkimin e prokurorit Arben Nela, pasi ai nuk justifikon pasurinë e deklaruar.
Vendimi i marrë nga KPA të martën vjen pasi ish-prokurori Nela e kishte ankimuar vendimin e KPK-së, vendim që mbante datën 23.07.2018. Sipas vendimi të zbardhur të KPK, prokurori i Tiranës, Nela, kandidat në atë kohë për në Këshillin e Prokurorisë ishte gjetur në shkelje fillimisht nga Inspektoriati i Lartë i Deklarimit dhe Kontrollit të Pasurive e Konfliktit të Interesit (ILDKPI), i cili e shpalli atë të papërshtatshëm.
Nela filloi punë si prokuror në Prokurorinë e Fierit në vitin 1998. Ai u transferua në Durrës në vitin 2006, ndërsa në vitin 2008 u transferua në Tiranë, deri në datën kur ai u shkarkua nga KPK. /r.e/
