TIRANË, 25 shkurt/ATSH/ – Pas shkarkimit të anëtarëve të bordeve në institucionet e arsimit të lartë, 12 universitetet shtetërore në Tiranë dhe në rrethe do të kenë gati bordet e reja për administrimin e tyre në muajin mars.
Këshilli i Ministrave ka vendosur si afat të fundit për dorëzimin e emrave të kandidatëve për anëtarë të bordit nga ana e senateve akademike 26 shkurtin, duke vënë në dispozicion nga ana e ministrisë përgjegjëse një komision, i cili për një afat 10-ditor do të bëjë përzgjedhjen e kandidatëve të propozuar nga institucionet e arsimit të lartë.
Ky vendim plotëson një prej kërkesave të studentëve, pasi u jep mundësi këtyre të fundit të jenë të përfaqësuar, por jo vetëm kaq. Ndryshe nga bordet që kanë administruar universitet deri më tani, vota e studentit do të ketë një peshë më të madhe sa i takon përzgjedhjes së kandidatëve për dekanë dhe rektorë.
Këshilli i Ministrave në vendimin e miratuar në Fletoren Zyrtare krahas kritereve të kandidatëve ka përcaktuar edhe masën e shpërblimit të tyre me një kufi maksimal prej 25 mijë lekësh në muaj.
Bordet e administrimit garantojnë qëndrueshmërinë financiare të universiteteve dhe përmbushjen e misionit të tyre.
z.tosku/j.p/
