TIRANE, 18 shkurt/ATSH/- 7 Monumentet e kulturës dhe vendet e kultit po përgatiten për të pritur turistët vendas dhe të huaj në këtë fillim sezoni turistik.
Institucionet dhe ekspertët përgjegjës për këto monumente po inspektojnë nga afër gjendjen e tyre, duke kontribuar si në mirëmbajtje gjithashtu dhe në rijetëzimin e tyre.
Një tjetër destinacion i denjë dhe gjithashtu vend kulti është gati të mirëpresë turistët. Në fshatin Kurjan të zonës së Roskovecit në Fier është restauruar Kisha e Shën Kollit, e cila është ndërtuar që në shekullin XIII, në stilin bizantin.
Kryeministri Edi Rama ka publikuar pamje nga Kisha e Shën Kollit.
“MIRËMËNGJES, dhe me këto pamje fantastike të Kishës së Shën Kollit në Kurjan të Roskovecit, e shpëtuar dhe e nxjerrë në dritë si një pasuri e çmuar për tërë zonën e Myzeqesë, ju uroj një javë sa më të mbarë”, shkruan Rama.
Kisha e Shën Kollit mbart vlera të rëndësishme të trashëgimisë historiko-kulturore dhe është shpallur Monument Kulture i kategorisë së parë në vitin 1963.
Kisha e Shën Kollit një ndërtim i tipit trikonkësh është ndërtuar me muraturë me tulla të kuqe dhe gurë të skuadruartek qoshet, kjo faltore është ndërtuar në shekullin XIII në stilin bizantin.
E përbërë nga Naosi (salla) dhe narteksi (parasalla) kisha e Shën Kollit, siç quhet nga vendasit, dikur mbulohej nga një qemer cilindrik tipik për kishat ortodokse.
Pikturat murale që zbukurojnë brendësinë e kësaj kishe, janë veprat e ikonografit Nikolla, biri i Onufrit dhe ndihmësit të tij, Joanit.
Ndërhyrjet që janë bërë në këtë kishë konsistojnë në restaurimin e çatisë, muraturës, fasadës së objektit, pikturës murale dhe sistemimin e ambienteve përreth objektit. /a.g/
