MAQEDONI – Dëbora izolon disa fshatra dhe shumë rrugë janë të pakalueshme

SHKUP, 10 janar /ATSH-MIA/ – Reshjet e dëborës kanë shkaktuar probleme në shumë rrugë në Maqedoni kryesisht drejt zonave të larta malore. Në fuqi janë ndalesat për kamionë përmes shumë qafave malore, ndërsa lëvizja e automjeteve është vështirësuar dhe ngadalësuar.

Qarkullimi ajror në Aeroportin ndërkombëtar të Shkupit deri tani po funksionon normalisht dhe sipas informacioneve nga web-i i tij  të gjitha fluturimet si në nisje dhe mbërritje po kryhen në kohë.

“Në rajonin e Shkupit të pakalueshme janë akset rrugore drejt vendeve më të larta të fshatrave Brezë, Tanushë dhe Malinë në komunën e Çuçer Sandevës dhe këto fshatra nuk kanë as energji elektrike. Në komunën e Kisela Vodës e pakalueshme është rruga nga Teferiç drejt Sopishtes”, thuhet në raportin për situatën e rrugës deri në orën 13:00 të Qendrës për menaxhimin e krizave.

Drejtoria hidrometeorologjike paralajmëroi se reshjet e dëborës nga pasditja do të shtojnë intensitet veçanërisht në pjesët perëndimore dhe veriore të Maqedonisë, ku trashësia e dëborës do të arrijë nga 10 deri në 20 centimetra, ndërsa në male edhe mbi 20 centimetra./ /v.b/ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.