Berat, takim me nxënësit ekselentë për festat e Fundvitit

TIRANË, 20 dhjetor/ATSH/ – Në sallën e konferencave të bashkisë së Beratit u organizua sot takimi me nxënësit e dalluar të shkollave 9-vjeçare.

Në këtë aktivitet ishin të pranishëm kryetari i Bashkisë, Petrit Sinaj, punonjës të institucionit të bashkisë, prindër, mësues dhe nxënës të shkollave.

Në fjalën e tij përshëndetëse kryetari i bashkisë shprehu kënaqësinë e tij që për dy vite rresht bashkia e Beratit në prag të festave të fundvitit ndan dhurata për nxënësit e dalluar.

Ai falënderoi nxënësit për arritjet e tyre, të cilët janë modeli që duhet ndjekur, falënderoi mësuesit për përkushtimin e tyre në edukimin e brezit të ri, prindërit për përkujdesjen që tregojnë, duke iu krijuar atyre kushte sa më të mira.

“Ky grup nxënësish janë si një pasqyrë për ne, ku ne shohim rezultatet e punës dhe të së ardhmes sonë”, – u shpreh ndër të tjera kryebashkiaku Sinaj.

Në vazhdim të aktivitetit u ndanë dhuratat për nxënësit e shkollave. /k.s/j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.